سحابة صيف

بدا العد التنازلي ... وبعد اسبوع بتكون حرمة حمد... وطول الايام اللي طافت وهي تحاول تقنع نفسها انها تتقبل هالواقع ... بس للحين مب قادرة تتحمل فكرة انه بياخذها لمجرد انه يذلها ... كم كثر آمنت بقسوة حمد بس عمرها ما تصورت انه ممكن يكون بهالقسوة ... حبها الاعمى له طول حياتها خلاها تغض البصر عن اخطاءه وخلاه يتمادى في هالاخطاء ... تصرفها السلبي معاه وسماحه له انه يذلها ويهينها في كل فرصة حصلها رسخ داخله انها شي من ممتلكاته ... الحين اكتشفت كم كانت علاقتها بحمد غلط ... وكان حبها لحمد ظلم لانوثتها وكبرياءها اللي ما كانت تنكسر الا جدامه ... كل ما ردتها افكارها لهذي النقطة ... تس عمرها انها تكره بزياده وانها ما تقدر تتقبله خلاص ... حتى لو فكرت في يوم انها تغفر له هو الحين يصعب عليها الوضع ولا حتى مفتكر يطلب السماح وكأنه من حقه يجرح فيها مثل ما يريد .... كانت في حجرتها تحاول ترتب في شنطها ... امها اليوم الصبح يابت لها كل الكنادير من عند المخورين ... والحين بس الحين اكتشفت انها ما تحلم وانها بتزوجه ... وهي ترتب كانت تدور في داخلها عن حبها لحمد ... تحاول تحيي هالحب اللي مات ... تدور عن ذرة احترام داخلها ... تريد تبدا حياتها اليديده وهي تحاول ... بالرغم من صعوبة هالشي الا انها في الاخير رضخت واستسلمت ... من تكون هيه عشان توقف في ويه العايلة والمجتمع والتقاليد ... مجرد وحده لا حول ولا قوة لها ... مجرد بنت في عالم ما يعترف الا بقوة الرجل وسيطرته ... دخل عليها خليفه وهي بعدها في عالم ثاني .... خليفه اللي بدا يحن ويتعاطف معاها ... ليش ما يرضى على عفرا ويتساهل يوم يكونن خواته ... كان يحس بالتشتت بين حبه لحصه وحبه لحمد ولد عمه ... بين ولاءه لابوه وتقاليده ... وبين حبه لعفرا بنته ... اللي صار مع عفرا غيره ... بس هوه يدري ان حصه من داخلها تريد حمد واللي صار كان بسبب لحظة غضب وكلمه قالها ذياب في لحظة طيش ... كان واقف وهو يشوفها ترتب اشياءها وسرحانه ... فتنحنح عشان تنتبه له

خليفه: احم احم
حصه: (لفت تشوف من دخل عليها وابتسمت بألم يوم شافت خليفه) هلا خليفه اقرب حياك لو ان الحجرة معفوسه
خليفه: عروس ما تنلامين ... هاه شو الاستعدادات
حصه: (وهي تضحك) ذكرتني بنكتت سمر عن الخروف اللي بيودونه المصلخ
خليفه: هاهاها وشو دخل ها في سؤالي
حصه: انا مثل خروف سمر احس اني انقاد للمصلخ
خليفه: بس عاد يا حصه ... من يوم يومج تدرين انج بتاخذين حمد وما اعترضتي شو اللي غيرج الحين
حصه: خليفه ... حمد ما يريدني لانه يريد يعرس ... حمد يريد يذلني وبس
خليفه: ردينا على هالكلام اللي ماله معنى ... اريد اعرف انتي من وين اتييبين هالكلام الخايس
حصه: ليش ما تبون تصدقوني
خليفه: الريال ما يعرس بحرمه عشان يذلها ... هذيلا انذال اللي يذلون حريمهم
حصه: وحمد طول عمره نذل مب من اليوم وامس
خليفه: (وهو بادي يعصب) حصه عيب عليج ... مب انا اللي بعلمج السنع حمد ولد عمج ... اياني واياج اسمعج اتعيدين هالكلمه .. او تسبينه
حصه: (تنهدت) اريد اعرف انا هالحمد شو مسوبكم ساحرنكم كلكم ... ولا ما تشوفون اللي يسويه
خليفه: حمد ريال ... والريال ما ينعاب ولا يتحاسب على ماضيه
حصه: خلاص .. اللي صار صار وكلامي ما بيغير شي من الموضوع انا ادري ...
خليفه: حاولي تسامحين يا حصه ... عمري ما تخيلتج حقوده هالكثر
حصه: حتى هوه ما عطاني مجال اني اسامح ... باجباري اني اتزوجه...
خليفه: يمكن هاي فرصه عشان تعرفينه عدل ... وساعتها بتسامحين صدقيني يا حصه حمد طيب
حصه: حرام عليك يا خليفه عمري كله وانا اعرفه ... الحين ياي تقولي بعرفه عدل بعد العرس.. حمد ما يتغير
خليفه: الله يوفقج يا اختي ... بعدين اريد اشوف فيج فرحة العروس وابتسامتها .. انا حاس انج تذبلين يا حصه
حصه: خليفه انت تقص علي ولا على عمرك ... أي فرحه وانا مغصوبه على واحد ما ابغيه ... انا اتمنى اموت قبل يوم الخميس عشان ما اتزوجه ... وانت تقولي فرحي
خليفه: بسم الله عليج يا حصه ... لا تقولين هالكلام ... وانا متاكد ان الله بيسر لج ويا حمد
حصه: (تغير الموضوع) ذياب ما يا للحين ... شو متى بينزل
خليفه: ذياب محجوز 45 يوم ما بيطلع لين بعد العرس باسبوعين
حصه: (تشهق) وانا بعرس وهوه محد
خليفه: هذا اللي بيصير
حصه: لا والله ما طلعت من بيتنا لين ما يرد ذياب ... شو كيف اصلا ابوي يوافق على العرس وذياب محد
خليفه: ذياب في الكلية .. وهذا مستقبله
حصه: مالي خص خليفه ... ما بعرس اذا ذياب ما حضر العرس ... والله ما اعرس وهالمرة صدق
خليفه: شو تقولين انتي وزعوا البطايق على الناس
حصه: مالي خص .. يكفي اني باخذ هذا ..بعد تباني اعرس واخوي محد ... ما اريد

حس خليفه باصرار حصه هالمرة وعنادها... فعلا تسويها ما بتطلع من البيت اذا ذياب ما حضر العرس وبعدين كيف ما فكروا يأجلون اسبوعين لين ما يخلص ذياب فترة الحجز ... وكيف غاب عن بالهم ... حتى ذياب بيزعل اذا ما حضر عرس اخته

خليفه: بنشوف له طريقة بنيبه يوم العرس
حصه: المهم يكون موجود

مسك خليفه تيلفونه واتصل في حمد ... كيف ما فكروا في ذياب ... لازم يطلعونه على الاقل يوم واحد من الكلية يحضر العرس ويرد ... يدري انهم يقدرون يدبرون هالموضوع وما بيغلبهم

حمد: الو
خليفه: السلام عليكم
حمد: وعليك السلام شحالك خليفه
خليفه: الحمدلله يسرك الحال .... هاه شو الاحوال عندك
حمد: الحمدلله كل شي تمام
خليفه: تعال بتخبرك ذياب للحين ما سويناله ترتيب عشان يحضر العرس
حمد: (يبتسم) من قالك اني نسيته ذياب بيرخصونه يوم الخميس الظهر يحضر غدا الرياييل وفي الليل بيرد الكليه
خليفه: (وهو مستانس) بشرك الله بالخير ... ما تنسى شي يا حمد
حمد: اكيد كم مرة بعرس ... هالمرة وبس ... صح العرس على السريع بس بعد ما نريد نقول ليتنا ما نسينا وليتنا سوينا
خليفه: زين عيل خلنا بنبشر العروس ... حالفة ما تظهر من البيت اذا ما حضر ذياب العرس
حمد: لا شو ما تظهر من البيت ... بنيب لها الدفعه كلها مب الا ذياب بس
خليفه: زين عيل بخليك تكمل شغلك
حمد: خلاص برايك في حفظ الرحمن

بعد ما بند خليفه عن حمد التيلفون خبر حصه ان حمد ما نسى ذياب ورتب موضوعه ... مما زاد من غيضها عليه حتى ذياب ما نساه ... يريد الكل يشهد حفلة انتصاره ... وتحطيمه لكبرياءها ... طلع خليفه عنها .. بس هالمرة ما كانت ترتب كناديرها في الشنط .. كانت تفر كل شي في الشنطه دون ترتيب عشان تطلع شوي من حرتها على حمد وعلى الوضع اللي حطها فيه
................