الصوت : اها ... انا ابوحميد زميل عبدالله في الشغل ... سمعت ان عبدالله مسكته الشرطة البارحة
ام محمد " بحزن " : اي مسكوه ..... خير تبي شي منه
ابو حميد " يفكر في الكلام الي يبي ايقوله " : ها ...... لا بس كنت " ويحك راسه " : كنت ابي اسئل متى حكمه ..... اي الحكم ...اكيد قالوا لكم المتى ؟
ام محمد " ترفع حاجب " : اي امبله باجر الساعة 1 الظهر
ابو حميد : اها ... خير إن شاء الله .... يالله مع السلامة
ام محمد : الله يسلمك
ابو حميد يضرب رأسه بغباء ويكلم نفسه بصوت مسموع : الحين ضروري يا غبي تتصل خليت المرة تهداء بعدين .... مالت علي اي والله الحكم
العامل يستغرب : كلت شي بابا
ابو حميد ينبته : ها ولاشي حط القهوة وروح لشغلك ... بسرعة
العامل : إن .... إن شاء الله بابا
شخصية ابو حميد " ابو حميد صاحب عبدالله ( بو محمد ) في الشغل واهو يطالب ابومحمد مبلغ 1000 دينار . وابو محمد ما عطاه .. ف اهو اتصل علشان ايقول لمرته ( ام محمد ) ولكن اتفشل لأنه استعجل ... فقال بينطر اشوي .
في طرف آخر ام محمد تكّلم نفسها : علامه هذا ... كلمتين على بعض مو قادر ايصّفهم ... الحمدلله والشكر ..... خلني بس اروح اكمل الغدة وبعدين اجيب اعيالي .
اهني علياء تطل براسها للحجرة الي ام محمد قاعدة فيها وكشت شعرها كانت كشه
ام محمد تنتبه ليها : بسم الله الرحمن الرحيم .... خرعتيني ... علامج جذي معفسة شعرج
علياء تدخل وتجلس مقابلة امها : يمه بعد توني قاعده من النوم ... انزين وين اخواني ما جو للحين
ام محمد تقوم من مكانها : لا ما جو بكمّل الغذة وبروح اجيبهم " وتذهب ام محمد للمطبخ ... وعلياء تلحقها
علياء : شنو الغذة ؟
ام محمد تدخل الدجاجة الفرن : دياي ( دجاج )
علياء بملل : اففففف كل يوم دياي دياي
ام محمد تصك الفرن : هذا الموجود تبين اكلي ما تبين كيفج
علياء تخرج من المطبخ وتتحلطم : بس هاذي الي عندها كل ما قلنا لها شي .. " تقلد على نبرة صوت امها " : تبون حيا الله ما تبون فمان الله ... " وترجع لصوتها الطبيعي " : غريبة غيرت الحين الكلام .... اففففف والله حالة ...اروح اجوف التلفزيون احسن ليي
تفتح هنا علياء التلفزيون وتشاهد .... وفجأة يأتي صراخ امها ..
ام محمد بصوت عالي : آآآآآآآآآآآآآآآآآآآآآآآآآآآآآآآآآآآآآآآي
تخاف علياء وتركض نحو المطبخ : يمه يمه شفيج
ام محمد : مسرعة ييبي القفاز اهني وفتحي الفرن انصك على ايدي بسرعة هكو اهناك " وتأشر لها "
علياء بخوف قليل : يمه حطي ايدج في ماي بارد اول ( تنظر إلى يد امها )
ام محمد تبتسم لها : إن شاء الله ماما " علياء ترد الأبتسامة وتخرج من المطبخ وتتكلم بصوت عالي : بسرعة عاد يمه ... لازم اتروحين اجيبين روعة وفاطمة من المدرسة .
ام محمد تتضحك : هههههههه وي صدقت عمرها اهي امي ... خلاص الحين بروح " وهنا يدخل محمد البيت "
محمد يبتسم : السلام
علياء وام محمد : عليكم السلام ...
ام محمد : خلاص عيل ما يحتاج آخذ علياء معاي اقعد وياها محمد ... انه بروح اجيب اخواتك
محمد ينظر إلى علياء : إن شاء الله يمه
تلبس ام محمد العباءة وتخرج من البيت ... يذهب محمد بجانب علياء ويكّلمها : إن شاء الله ما يننتين امي بسوالفج الفاضية
علياء اطالعه من فوق : تطمن ما اذيتها ... اصلن انقذتها
محمد يرفع حاجبه بأستغراب : شلون انقذتينها
علياء بأبتسامة فخر : دخلت امك ايدها في الفرن وانصك عليها ... وانه لبست القفاز وفتحت الفرن وقدرت اطلع ايدها .. تغمز بعيونها لمحمد
محمد ايجاريها : ما شاء الله عمل كبير تستاهلين تصفيق " ويصفق محمد "
علياء اتبوز : ما ابي تصفيق ... ابيك اتوديني البرادة
محمد يذهب عنها : بعدين ... بعدين ... عقب الغذة
علياء تستانس : انزين
" ذهب محمد إلى الحجرة وبّدل ثيابه ... وكمل اثناء ماذهب لرمي ثيابه للغسيل دخلت امه ومعها اخواته
روعة : يالله انه رايحة ابدل هدومي ما اابي انزل إلا الغذة زاهب
محمد ينظر لها بملل : جم مرة اقول لج الناس ايسلمون اول ... ايقولون السلام
روعة تعطيه ظهرها وتذهب عنه : كل يوم بس انه كيفي
محمد يتأفف على طريقة روعة في كلامها .... تذهب له فاطمة وتكلمه : ما عليك منها لا تكلمها ... ذي مخها غيرعنا ... خلها ابروحها
محمد يهدأ نفسه : انزين روحي انتين بدلي اثيابج مسرعة ..... تراني يوعان
فاطمة :انزين يا اخي العزيز
يبتسم محمد ..... وام محمد تبتسم على عيالها الي كل واحد يحب الثاني وشايل هم الثاني ... بدّل الجميع الثياب وجلسوا لتناول الغذاء وبعد ما كملوا وغسلوا ايدهم
ام محمد : ابي الكل ايجي اهني يقعد بقول لكم موضوع
الكل قعد وينتظرون كلام الأم ... ولكن روعة بدت الكلام
روعة : اي يمه يالله قولي ليش البيت مخّرب
ام محمد : جايتنكم بالكلام .... بتّكلم وماابي احد يقطعني
الجميع : إن شاء الله
ام محمد : ادري انكم ماراح تفهمون كل الكلام الي بقوله ... لأنكم بعدكم يهال ...بس الدنيا احيانا اتخلي الواحد يكبر اكبر عن عمره من الظروف الي تحطيه ... مو يكبر يعني يكبر بسرعة ايصير عمره 20 لالا تكبر نفسه ... كلامه ... بس الشكل والعمر يظل ... المهم امس باليل وللأسف قلت لأبوكم لا تروح المسيرة ... اهو عاندني وراح ومارجع البيت إلا والشرطة وراه اهو دخل واتغيب .. اهم كسروا الباب .. دخلوا وضربو بالرصاص وكانوا بياخذون محمد بدل ابوكم ... بس اهو طلع وسلم نفسه ليهم ... و بعدين العصر نقدر انروح ليه ... وباجر الظهر بيصدر الحكم
روعة : حكم شنو

ام محمد تكمل كلامها : الحكم يعني المدة الي راح ابوكم يقعد فيها في السجن .. بعيد عنكم
فاطمة : وكم احتمال اتصير ؟ المدة بالشهور ؟
ام محمد تصحح المعلومة : لا بالسنوات وما يكون اقل من 3 سنوات
الجميع : شنو ؟ من صجج
ام محمد بحزن عميق : اي من صجي ... ويالله روحوا درسوا علشان ما تصير الساعة 4 إلا واحنا في الشرطة انزور ابوكم
الجميع : انزين
وفي جهة اخرى بيت ابو ناصر
ابو ناصر يكلّم ام ناصر امام ناصر وزهرة : اي صح ... بقيت اسئل اخوج عن الأرض الي قلت ليه عنها حق رفيقي
ام ناصر تترك فنجان القهوة وتتلعثم : اخوي ؟ .... اي ارض
ابو ناصر يستغرب : اشفيج ؟ اي اخوج انا قلت ليه يشتري ارض حق رفيقي وعطيته المواصفات ... انزين انا ضيعت رقمه اعطيني اياه
ام ناصر تفكر في روحها : انه لازم اقول ليه الحقيقة ... ولا اعور راسي من الف والدوران " وترفع صوتها تكلم العيال " : ناصر وزهرة يالله روحو غرفكم خلوني اكلم ابوكم في موضوع
ناصر يمسك ايد اخته ويروحون
ابو ناصر : شفيج اليوم ؟ مو طبيعية ؟ شصاير ؟ وشنو الموضوع الي بتكلميني فيه
ام ناصر تبلع ريجها : اهدء انت واقول لك كل شي
ابو ناصريتسند للوراء على الكرسي : انزين قولي
ام ناصر تحرك ايدها بطريقة اتدل على التوتر : اخوي البارحة مسكوه الشرطة وحبسوه
ابو ناصر يرفع حواجبه بدهشة : وليش عاد مسكوه ؟ شسوه اهو ؟
ام ناصر تتنهد : لأن راح المسيرة ... وبعدين طبّوا عليه في البيت ومسكوه
ابو ناصر يحرك راسه يمين يسار : لاحول ولا قوة إلا بالله .. وليش اهو ايروح المسيرة وايخاطر بحياته ما يدري ان الكل يحبسونه لا كبير ولا صغير
ام ناصر توقف : طول عمره اهو جذي ... ايمشي الي في راسه ولا يحاسب خطاء او صح او شنو راح يترتب على الي يسويه
ابو ناصر يوقف بجانبها : الله يهديه إن شاء الله .. ويتعلم من ها القضية الي سواها
ام ناصر تقابل ابو ناصر : على العموم ... اهو محكمته باجر الساعة 1 الظهر ... وفي اليوم ليه زيارة من الساعة 4 إلى 6 .... ها تقدر اتوديني ؟
ابو ناصر : اكيد .... اهو اخوج ولازم نوقف معاه ... وانجوف شنو يحتاج
ام ناصر تبتسم ليه ابتسامة عذبة مليئة بالحب والأمتنان . ثم قامت ام ناصر لتتصل ب ام محمد ..... التلفون يرن في بيت ام محمد ... ترفع السماعة
ام ناصر : آلو ... سلام
ام محمد : هلا ... عليكم السلام
ام ناصر تدخل في الموضوع على طول : آآ ... عندج احد يوصلج اليوم حق الزيارة ؟
ام محمد : لا ... بس قلت بجوف رفيقه ابو فراس لأن اتصل لي وقال اي شي ابي اقول له
ام ناصر تعظ شفاتها وتفكر : لالا ما يحتاج لا تكلفين عليه ... انه ابو ناصر قال بيوديني بنمر عليكم وبنروح له
ام محمد : خلاص اوكي .... إلا بسئل قلتين بعد لعيالج ؟
ام ناصر : لا ما قلت إذا سئلو بقول ما سئلو خلاص هم مردهم بيعروفون .
ام محمد : اي عدل
اما ناصر : خلاص جهزي روحج وجهزي اثياب لأبو محمد علشان انوديهم ... وعيالج بعد ... عقب نص ساعة بنكون عندكم
ام محمد : صار ... وعيالج وين بتودينهم ؟
ام ناصر : بيت جيرانا .... يالله مع السلامة
ام محمد : الله يسلمج
وتذهب ام محمد إلى عيالها ... كانت علياء ترسم
علياء : يمه جوفي رسمتي
ام محمد تنظر إلى الرسمة وتبتسم : حلوة وايد طالعة على الي راسمتها
علياء : صج يمه حلوة الرسمة
ام محمد : اي حلوة
علياء : خلاص بوديها لأبوي يجوفها
ام محمد تبتسم بحنان : كيفج
محمد : يمه انا كملت واجباتي بروح الحين اتسبح
ام محمد : شاطر عفيه عليك .... اوكي اخذ ثياب حلوة ها
محمد وهو يذهب لخزانة ملابسه : إن شاء الله يمه
فاطمة اتعدل شعرها في المرآة وتكلم امها : ها يمه شعري عدل مرتب ؟
ام محمد : اي عدل ........ ها روعة ما كملتين دراسة
روعة بملل : لا للحين عاطينا وايد اليوم ... بس ما باقي إلا شوي
ام محمد : يالله خلصي ... وتنظر إلى الساعة : عندج ربع ساعة
روعة : انزين
وتذهب ام محمد إلى غرفتها وترتب ملابس لأبو محمد في حقيبة صغيرة واشياء اخرى ... وهي تفكر في الحكم ماذا سوف يكون .... وبعد وقت جهز الجميع ... وجلسوا بالصالة ... وبعدها تدخل ام ناصر
ام ناصر : يالله قومو بسرعة ركبوا السيارة ورانا سيد وش طوله

شرطي ( ب) : اي على راحتك
ويذهب الشرطي عنه .... في حين وصل افراد عائلة ابو محمد إلى البيت
ام محمد : يالله روحوا صلوا اذن
الجميع : إن شاء الله
علياء : ماما انه ما اعرف اصلي
ام محمد تبتسم لها : ما يحتاج انتي .... توج اصغيرة ... لمن تروحين المدرسة تصلين
علياء : والمتى بروح المدرسة ؟
ام محمد وكأنها تفكر : ماباقي شي .... بس شوي .... ويالله عن الأسئلة الزايدة ... روحي ويا اخوانج الحجرة
علياء : انزين
(نبذة عن ام محمد ) : " ام محمد اصلها سعودية ... ويوجد لها اهل في السعودية وابو محمد يكون ولد عمها ... لذا فهي من عائلة العالي والتي نصفها في السعودية والأخرين في البحرين "
ذهبت ام محمد إلى الصلاة واكملت وعندما انتهت ..... رن الهاتف
ام محمد توضع السجادة في الخزانة وتذهب مسرعة إلى الهاتف : آلو
راشد : آلو .....هلا اختي
ام محمد تبتسم : هلا اخوي عاش من سمع ها الصوت
راشد : عاشت ايامك ..... كيف الحال ؟
ام محمد : بخير الحمدلله .... نسئل عنكم ؟
راشد : احنا تمام الحمدلله
ام محمد : الحمدلله .... طيب مافي اخبار جديدة ؟
راشد : لا مافي ....... وانتي ؟
ام محمد بتفكير : اي احنا .... ابو محمد انقط في السجن
راشد بصدمة : ليه طيب ؟
ام محمد : الأخ ايسوي اشياء ما ترضى ابها الحكومة ... فما كان إلا ان يسجنونه .... وباجر الحكم
راشد : ايه ... كذا السالفة .... طيب اهو ما يعرف إن هذا ممنوع ؟
ام محمد : بلى يعرف ... بس عناد ... علباله شجاعة
راشد : ههههه والله إن سالفة بعد هذا .... زين يالله ما اطول عليج ... وبعد انتي تخسريني .... يالله سلمي على الكل
ام محمد : يبلغ ..... يالله مع السلامة
راشد : مع السلامة
" راشد احد اخوة ام محمد الذين يعيشون في السعودية .... وهو يعمل في احد البنوك .... طيب ويحب يسئل ويساعد .... "
وتذهب ام محمد لعمل العشاء : محمد ..... محمد يمه " تناديه "
محمد : نعم يما .... نعم
ام محمد تعطيه في يده فلوس : روح اشتر خبز حق العشا
محمد : إن شاء الله يمه
ام محمد : انتبه في الطريق .. روح بعيد عن السيارات
محمد : لاتحاتين .... اعرف خلاص
ام محمد : يالله عيل اتوكل
ويذهب محمد وبعد وقت يعود ويتعشى الجميع ... من ثم ذهبوا للنوم .... وفي اليوم التالي .... يجلس العيال كالعادة للذهاب إلى المدرسة ... اوصلتهم ام محمد ... ومن ثم عادت إلى المنزل ... واثناء ما هي ترتب المنزل وتنظفه ..... يرن الهاتف .... وتذهب ام محمد لرفع السماعة ...
ام ناصر : هلا
ام محمد : هلا والله
ام ناصر : ها .... جهزتين
ام محمد تستغرب : اجهز من الحين .... توها الساعة 7 ونص
ام ناصر : توني متصلة قالوا قدّموا المحاكمة الساعة 8
ام محمد : اها ... خلاص الحين بتجهز
ام ناصر : زين ... مسافة الطريق وجاية لج
ام محمد : انزين .... يالله مع السلامة
ام ناصر : الله يسلمج
ام محمد خائفة من الحكم ... وتدعي من الله ان يخفف الحكم ويكون قليل ... وبعدها وصلت لها ام ناصر ... وذهبوا إلى المحكمة ... وبعدها يدق القاضي ثلاث مرات لبدء المحاكمة ..... ويدخل ابو محمد إلى المحكمة وينظر من بين القضبان إلى ام محمد واخته ام ناصر ...
القاضي بعد التشاور والحديث يتكلم : حكمت المحكمة على المتهم عبدالله العالي بثلاث تهم .. الأولى مشاركته في المسيرة الحقوقية والحكم عبارة حبس لمدة ثلاث سنوات ....
ينصدم كل من ام محمد وام ناصر وكذلك عبدلله ... ويكمل القاضي : والتهمة الثانية تهريب الكتب الدينية من البحرين للسعودية والحكم هو حبس لمدة اربع سنوات
ام محمد بصوت منخفض : لا لا ... ام ناصر تمسك يدها وتهدائها .... ويكمل القاضي : والتهمة الثالثة المتاجرة بالمسدسات دون ترخيص والحكم هو ثلاث سنوات ... ف الأجمالي يكون حبس لمدة 10 سنوات مؤبد
ابو محمد يصرخ : لا لا ليش ؟ ويضرب رأسه في القضبان : لالالا
ام ناصر انزلت رأسها ... وام محمد تبكي بحرارة ..... ويأتي الشرطي ويأخذ ابو محمد ليخرجه إلى السجن ..... وتخرج ام محمد وام ناصر وهما تبكيتان .... ويصلا إلى السيارة .. وتجلس ام محمد في السيارة وتظل صامتة وبكائها منخفض ... ويجول في مخها الأسطر التالية مع لحن حزين :

وين ضعت ؟
وين رحلت ؟
ضعت وضيعتني
وخليتني في غربة ظالمتني
جرحت قلبي
ونشرت همومي
وذرفت دموعي
بضياعك يا ضايع
خليتني في دنيا
ما راح ترحمني
اتصد وتجرح فيني
من الي بيرحمني ؟
او من الي بيعطف علي ؟
يا ضايع الدنيا تتغير !
وما راح اتلاقي احد خيّر

يقطع سكوتها صوت ام ناصر : يالله ام محمد وصلنا البيت
ام محمد تنتبه وتمسح دموعها : يالله مع السلامة
ام ناصر : مع السلامة
وايضا ام ناصر يجول في مخها بعض الخواطر اثناء ما تسوق السيارة :
ياخوي وين رحت
وحبست روحك
وين رحت بعيد عني
وتحرمني من اخو قريب مني
ياخوي ما عندي غيرك
ولا راح احد ايكون محلك
انت اخوي
مسحت دموعي
وكنت مثل البلسم على جروحي
لكن
الحين رحلت عني
من الي بيمسح دموعي من بعدك ياخوي ؟
من الي يراضيني بعد زعلي غيرك يا خوي ؟
من يطمّني ويريحني غيرك
من بيحظني
ويصير لي مثل ابوي
الي رحل بعيد عني
وخلاني بحالي
ليش ياخوي
اترووح عني
دنيا ما تسوى
اتخليها اتكون حوولي
ياخوي
يا ضايع